Parosifa fain Yut-ke siisimok

Miimow opora

Yut Yeesus wiamun oko-ke. O parosifa siisimok fain parosifa erup Pita wia siisimomak nain saarik, opora lawisiw epaskun. Mua Maneka teeria opora fain wia maakek, wi mua opor eliwa iiwuarimik nain me wia miimuk. Ne pun wia maakek, “Mua Maneka-ke opor opowa sira kuisow nain i Kristen teeria yiek. Ne i Yeesus opora opimik nain mua kuisow kiripap sira oko-pa me mauk,” naap maek.

Jude

1 Aria parosifa fain yo Yut-ke ni Yeesus Krais teeria nia siisimomiyem. Yo eena Yems wiamun ne pun Yeesus Krais uuwow mua nain. Ona Wiawi Mua Maneka-ke nia farep nia aawok, naeya ona nia kookalem-ikaiya nain furewiman, ne Yeesus Krais ona pika nia opap ikaeya ikeman, ni teeria nain. 2 Feenap nia naimik, Mua Maneka nia kemaliya nain furewap ni kema sonom eliwa ikowen, ne mua wia kookalowa sira nain kema manekiw ikok naap oniwkin niar manekarem-ikainok, naap nia naimik.

Wi Mua Maneka opora iiwuarimik teeria nain

3 Emar unowik, Mua Maneka-ke i unowiya yia aaweya epaskun ikemik. Opora nain yo siisimowa kema ikem, nain me siisimem. Moram yo opor oko fain ookeka naep kema-ke efar urupeya siisimiyem. Feenap, Mua Maneka opora wiar opap ikeman nain kekanep ikok opor makena maemi wi wadol opora onimik nain wiar puukam-ikeka. Moram Mua Maneka opora eena i ona teeria yiek nain iiwawun maneka i wapena-pa yiar wuak. 4 Ni naap onam-ikeka, moram mua papako ni nionarep ikemik nain eliwa-ke wia naiman, nain wi wadol mua-ke. Wi opora kiripap maimik. Neemi Mua Maneka mikikira iwemi ona yia kemaliya nain opora kiripami feenap maimik, “Mua Maneka yia kemalep yia saliwam-ikaiya. Naapeya i sira samo-samora eliw onam-ikaiyen,” naap maimik. Wi naap onimik nain Yeesus Krais waisow yiena Saria ne yiena Maneka-ke me naimik, mikikira iwimik. Mua Maneka opora iiriw wia maep siisimep-puamik, feenap, wi mua nain ikoka Mua Maneka wia mekawowa epa neeke sirirowa aawep iiwawun mesenalikuan.

5 Iiriw wi Isrel Isip-pa yoowa aawem-ikaiwkin Mua Maneka-ke wia aawep epa oko wia pikiwok. Ne ikiwem-ikok opora me wiar opam-ikemik, wi nain akena wia samoreya umurumemik. Ni nain iiriw wiar amisareman, nain yo opora nainiw enumiyem. 6 Ne fain pun wiar kema suuweka, iiriw wi ensel Mua Maneka-ke kekanowa wiemi uuwowa wiek. Nain wis-ke kekanowa wiar nomaku naep owowa wia wuomak nain piipuamik. Naapeya Mua Maneka-ke seniw wia kaikurumep epa kokom tenow akena-pa wia wuap-puak, naap ikaiwkin ona fofa maneka wuak neeke iiwawun wia weeser-wuinen naep. 7 Ne iiriw fain pun naap, wi Sodom ne Gomora sira samo-samora naap onam-ikemik, ne owow papako mamaiya-pa wiar ikemik nain pun. Uruw mia me kaikowa sira samo-samora onam-ikemik, ne mua muaiw wiam opam-ikemik. Naapeya Mua Maneka-ke wia samoreya wi mukuna anane ikaiya nan sirirowa aawem-ikaimik. I aakisa miiw mua unowa nain wia kema suuwap amisa aawuk naep naap wia onak.

8 Ne wi mua ni teeria-pa aremik nain wis pun sira naap onimik. Inawowa sira-sira inawap kema iikireya sira samo-samora onami wiena mia wiam samorimik. Ne Mua Maneka opora wiar fienimik, ne iinan ensel kekanowa teeria pun wia firekimik. 9 Wi ensel kekanowa opor samora me wia maakowa-ke. Naeya ensel miimow mua Maikel pun sira naap me onak. Moses sawi napuma aawu naep Satan ikos oporiw irakemik. Naeya keker opap Satan-ko me firekak, weetak. Oram feenap maakep-puak, “Mua Maneka ona nefa amukarinok,” naap maakek. 10 Nain wi mua nain kekanowa me wiar amisarowa oram wia firekap-puimik. Wi mua nain-ke maa eneka saarik kema marewa, wiena mia kookalowa manekiw ikemik nain ookimik. Wiena sira nain-ke iiwawun wia samoriya.

11 Aa, nefa komarka! Wi Kein ^{▼▼1.11Kein wiamun Abel ifakimok. Nanar nain Yenesis 4.3-8-pa urufowen.} era wiar ookami sira samora onimik. Ne oko pun, wi maamuma aawowa muuta nain Baalam ^{▼▼1.11Nanar nain Namba 31.16-pa urufowen.} sira onak nain ookimik. Ne oko, iiriw Kora emina kekanep Mua Maneka opora wiar fienak, ^{▼▼1.11Nanar nain Namba 16.1-pa urufowen.} ne aakisa wi nain pun sira nain ookimik. Ne Mua Maneka Kora samorak nain ikoka wis pun naap wia samorinon.

12 Aria ni Mua Maneka teeria kema kuisow ikok niam fiirimep enowa oniman nain wis pun kererep niamiya maa enimimik. Nain wi maa kookalep emin ururowa marew wis-keriw arimik. Naeya wi maa tumina saarik ni pokow eliwa nain niar tuminarowimik. Wi fain saarik, ipia kokoma wuiya, nain ewar-ke wuunoweya ipia makena me oraiya. Ne oko pun fain saarik, nomokowa me makenariya nain. Nomokowa naap nain perekiwkin onom onaiyik ififarep fufukaremi iiwawun weeserinon. 13 Wi sira samora onimik nain emina me ururimik. Wiena sira samora nain feenap, ifer umukut maneka kuemi fofola mamara onaiya kia kirem-ikaiya naap. Wi mokoma saarik, ona epa-pa me ikaiya, iiwemi mesenaliya naap. Wi teeria nain Mua Maneka-ke epa kokom tenow akena iiriw wia tawerarep-puomak. Wi anane maneka neeke ikaikuan.

14 Adam aka-pa mua imenar-ikip ikip ikur okaiwi-pa kuisow aremi Inok imenarek. Os-ke wi mua teeria samora nain wiar maemi opor kokosa maek,

“Nee urufeka, Mua Maneka ona ensel teeria manek akena wiamiya ekapem-ikaiya.
15 Wi miiw mua wia mekawowa naep oniya. Ne wi mua o me ookimik nain wiena sira samo-samora nain ariman opora-pa wia wuami wia samorinon. Wi pina mua o iiwawun mikikira iwemik. Naapeya os-ke pina wia kiripomaya o opor samora onam-ikemik neeke sirirowa aawikuan.”
16 Wi mua nain wi gaagirinowa-ke, ne anane wia aakunowimik. Wi wiena kema suuwowa samora nain muutiw ookimik. Ne anane alakuem-miawemi wiena unuma wiam purupimik. Ne maa kookalowa muuta nain mua oko opor afila wiimik.

Yeesus Krais opora kekanowa opap ikowa

17 Aria emar unowik, maa mauwa wiimar imenarinon nain, yiena Maneka Yeesus Krais aposel teeria-ke iiriw maemik. Ni nain niam kemapawam-ikeka. 18 Feenap maem-ikemik, “Miiwa weeserow epa-pa wi mua emina kekanimik nain unow akena imenarikuan, nia firekow opora onikuan. Mua Maneka mikikira iwemi wiena kookalowa-pa sira samo-samora nain ookikuan,” naap maemik. 19 Wi wadol mua nain-ke ni teeria kema nia mikiwkin niam fo-fookiman, moram Ewar Eliwa wiamiya me ikua. Naeya wi mia kookalowa ookami nain kema manekiw ikemik.

20 Aria emar unowik, ni Mua Maneka opora opam-ikaiman nain ona niek. Ni opora nain baliwep ook-ikiwemi niam kekanowam-ikeka, naeya baliwep ikowen. Ne Ewar Eliwa-ke kema niem-ikaeya anane Mua Maneka farem-ikeka. 21 Yiena Maneka Yeesus Krais nia kemalep ekapep nia aaweya o wameiya ikok anane eliwa ikowen. Ni nain arewap ikaiman. Naap ikok Mua Maneka yia kookaliya, naap maemi kemaiw ikeka. 22 Wi Yeesus Krais ookowa kema ere-erup arem-ikaimik nain wia kemalep kekelka wia wueka. 23 Wi teeria papako wakiep mukuna-pa oru naep onimik nain wia opap ewur wia iikiroweka. Ne wi papako sira samora onowa kema iiriw wiar kekanek nain wia kemaleka. Wiena sira samora nain-ke era iiwawun tauwat opak. Sira nain-ke wiena mia suuwowa pun tuminarowamik, naap maemi sira wiar keker opaka.

I Mua Maneka unuma pirikua

24 I Mua Maneka unuma wiar pirikua. Os-ke nia urufam-ikaeya ni me wakiowen. Ne nia aawep ona miir onoma eena parina onaiya ikua neeke nia wueya ni tumin marew, dubil manekiw ikok kemelowiw ikowen. 25 Mua Maneka-ke ona waisow i yia aawow mua-ke. Emawik aa. I yiena Maneka Yeesus Krais unuma-pa unuma wiar pirikua. O kekanowa ne unum maneka onaiya ikua. Maa muutitik os-ke urufiya. Iiriw miiw maa muutitik me imenarowa ikok ona naap ikua, ne aakisa pun naap ikaiya, ne anane maneka naap ikainon. Makena.